Wales Airshow

Taking to the skies over Swansea Bay on 5 and 6 July 2025

Newyddion mawr wrth i’r Red Arrows ddychwelyd i Abertawe

By

​​​​​​​Bydd tîm Red Arrows byd enwog yr RAF yn dychwelyd i Abertawe i ddiddanu’r dorf yn Sioe Awyr Cymru’r haf hwn.

Red Arrows Mumbles Swansea

Dyma’r enw mawr cyntaf a gadarnhawyd ar gyfer y digwyddiad deuddydd nodedig am ddim a gynhelir ym Mae Abertawe ddydd Sadwrn 5 Gorffennaf a dydd Sul 6 Gorffennaf. Mae’r sioe flynyddol dros forlin 4 milltir y bae, a drefnir gan Gyngor Abertawe, yn denu mwy na 200,000 o breswylwyr ac ymwelwyr o bob cwr o Gymru a’r DU.

Bydd y Red Arrows, sy’n enwog am arddangosiadau awyr gwefreiddiol a hedfan manwl gywir, yn perfformio ar y ddau ddiwrnod eleni, gan roi cyfle i gefnogwyr weld trefniannau nodweddiadol, symudiadau brawychus ac olion mwg coch, gwyn a glas disglair.

Ar y tir, bydd ymwelwyr yn cael mwynhau amrywiaeth o opsiynau adloniant, gan gynnwys stondinau masnach, bwyd a diod blasus, cerddoriaeth fyw a gweithgareddau difyr i bobl o bob oedran. Bydd yn benwythnos llawn cyffro i deuluoedd, y rhai hynny sy’n dwlu ar awyrennau a thwristiaid fel ei gilydd.

Meddai’r Cynghorydd Robert Francis-Davies, Aelod Cabinet Cyngor Abertawe dros Fuddsoddi, Adfywio, Digwyddiadau a Thwristiaeth, “Mae’n anhygoel bod y Red Arrows yn dychwelyd eto, ac mae’n wych y bydd y tîm yn perfformio ar ddau ddiwrnod Sioe Awyr Genedlaethol Cymru 2025. Rydym yn gwybod y bydd ymwelwyr mor falch o weld yr arddangosiadau hyn ag erioed. Mae’r digwyddiad hwn yn un o uchafbwyntiau calendr haf Abertawe, ac rydym yn disgwyl y bydd yn hynod boblogaidd eto eleni.”

Yn ogystal â’r Red Arrows, cyhoeddir mwy o arddangosiadau awyr gwefreiddiol ac atyniadau ar y tir dros yr wythnosau nesaf. Dros y blynyddoedd blaenorol, mae’r rhain wedi cynnwys awyrennau eiconig megis Hediad Coffa Brwydr Prydain, Typhoon y Llu Awyr Brenhinol, ac amrywiaeth o dimau erobateg rhyngwladol.

Miloedd yn mwynhau penwythnos Sioe Awyr Cymru

By

Roedd penwythnos Sioe Awyr Cymru’n un gwych gyda channoedd ar filoedd o bobl yn mwynhau digwyddiad awyr agored am ddim mwyaf y wlad.

Cafodd ymwelwyr o bob rhan o’r DU eu difyrru gan arddangosiadau’r Red Arrows, Typhoon yr Awyrlu Brenhinol ac eraill dros ddeuddydd y sioe awyr.

Roedd torfeydd enfawr wedi mwynhau amrywiaeth eang o arddangosfeydd rhyngweithiol, gweithgareddau ac adloniant byw ar y ddaear yn ogystal â gweld y cyffro yn yr awyr yn y digwyddiad a drefnwyd gan y Cyngor.

Roedd nodweddion newydd yn cynnwys Pentref y Cyn-filwyr i anrhydeddu holl gyn-aelodau’r lluoedd arfog. Dathlodd ymwelwyr y cyfraniadau sylweddol a wnaed i’r DU gan y rheini sy’n gwasanaethu ac sydd wedi gwasanaethu yn y lluoedd arfog.

Roedd y sioe yn nodi Diwrnod y Lluoedd Arfog Cymru, gyda’r gweithgarwch ar y dydd Sadwrn yn cynnwys seremoni ac adloniant ar lwyfan. Cafodd cân wreiddiol a ysgrifennwyd gan grŵp o gyn-filwyr ei pherfformio’n gyhoeddus am y tro cyntaf yn y digwyddiad.

Talwyd teyrnged gan Aelod y Cabinet, Robert Francis-Davies, i’r ymdrech a wnaed gan staff y Cyngor, y gwasanaethau brys, noddwyr y sioe a phartneriaid eraill y Cyngor a helpodd i wneud y digwyddiad yn un o’r radd flaenaf ar gyfer y ddinas.

Mae amrywiaeth o ddigwyddiadau o safon yn cael eu cynnal yn Abertawe eleni, gan gynnwys Cyfres Para Treiathlon y Byd Abertawe ar 22 Mehefin, IRONMAN 70.3 Abertawe ar 14 Gorffennaf, a thridiau o gerddoriaeth ym Mharc Singleton o 18 i 20 Gorffennaf. Rhagor o wybodaeth: www.joiobaeabertawe.com   

Roedd noddwyr sioe awyr eleni’n cynnwys Aerodyne, Day’s Rental, First Cymru, FRF DS Abertawe, FRF Toyota, Great Western Railway, Greatest Hits Radio, Lidl, Radnor Hills, Y Lleng Brydeinig Frenhinol, Trafnidiaeth Cymru a Travel House.

Disgwylir i Sioe Awyr Cymru’r flwyddyn nesaf gael ei chynnal ar 5 a 6 Gorffennaf.

Sioe Awyr Cymru’n dychwelyd i Fae Abertawe dros y penwythnos

By

Mae Sioe Awyr Cymru – sy’n para am ddeuddydd ac sy’n cael ei threfnu gan eich cyngor – yn dychwelyd!

Meddai Pennaeth y Gwasanaethau Diwylliannol, Tracey McNulty, “Bydd degau ar filoedd o bobl yn dod i’r sioe nodedig hon – bydd llawer i’w fwynhau.

“Rydym yn diolch i’r rheini a fydd yn gorfod newid eu trefn ddyddiol o bosib oherwydd y newidiadau i’r ffyrdd a fydd ar waith er diogelwch pawb. Rydym hefyd yn diolch i’n noddwyr a’n cefnogwyr.”

Bydd y nodweddion ychwanegol eleni’n cynnwys Pentref y Cyn-filwyr, er mwyn anrhydeddu cyn-aelodau’r lluoedd arfog.

Dewch i weld y Red Arrows, os yw’n bosib. Byddant yn hedfan dros Abertawe am 5.15pm nos Sadwrn.

Dros y penwythnos, bydd Typhoon yr Awyrlu Brenhinol hefyd yn dychwelyd ar y ddau ddiwrnod, yn ogystal â hofrennydd Wildcat Black Cats y Llynges Frenhinol.

Ceir ymddangosiadau hefyd gan Team Raven, sy’n arbenigo mewn erobateg, y Vampire o Norwy a Thîm Parasiwt Red Devils byd-enwog y Fyddin – yn ogystal ag awyren ddwbl Fairey Swordfish, hofrennydd Westland Wasp, Rolls-Royce Spitfire (dydd Sul yn unig), Yak50, Tîm Erobateg Starlings, tîm arddangos hofrenyddion Sgwadron Gazelle, hofrennydd Sea King a thîm erobateg Firebirds.

Bydd arddangosiadau ar y ddaear i’r holl deulu, gan gynnwys replicâu o Hurricane a Typhoon, arddangosiadau milwrol, bwyd a diod, adloniant byw, ffair bleser, hen gerbydau milwrol, amgueddfa D-Day symudol, stondinau masnach, y Parth Modurol i’r rhai hynny sy’n dwlu ar geir – ac ardal hwyl newydd i’r teulu.

Bydd efelychwyr hedfan, band Tywysog Cymru, cerbydau ymladd mawr a Phentref y Cyn-filwyr.

Mae modd cadw lle ymlaen llaw mewn mannau parcio dynodedig o hyd, bydd cyfleusterau parcio a theithio ar gael yn Stiwdios y Bae a safle parcio a theithio Glandŵr y cyngor, a gallwch deithio i’r sioe ar y trên a’r bws.

Mae ap swyddogol Sioe Awyr Cymru’n cynnig mynediad at amserlen swyddogol o arddangosiadau, newyddion byw, bywgraffiadau am awyrennau a mwy. Mae ar gael ar ddyfeisiau Android ac Apple am ffi untro o £1.99; gellir ei lawrlwytho eto am ddim os ydych wedi ei brynu o’r blaen.

Mae trefnwyr a phartneriaid yn cymryd nifer o gamau i leihau effaith amgylcheddol y digwyddiad. Mae’r rhain yn cynnwys mwy o fannau ailgylchu nag erioed o’r blaen a thair gorsaf ail-lenwi dŵr.

Bydd bandiau arddwrn am ddim i ddiogelu plant rhag mynd ar goll ar gael o fannau gwybodaeth y sioe awyr, staff meysydd parcio, cadetiaid a stiwardiaid ar hyd y promenâd, ac o stondinau’r heddlu a’r gwasanaeth tân yn y Senotaff.

Bydd gweithwyr Ambiwlans Sant Ioan ar gael mewn mannau cymorth cyntaf.

Mae’r noddwyr a’r cefnogwyr yn cynnwys Aerodyne, Day’s Rental, First Cymru, FRF DS Swansea, FRF Toyota, Great Western Railway, Lidl, Radnor Hills, y Lleng Brydeinig Frenhinol, Trafnidiaeth Cymru, Travel House a Greatest Hits Radio.

Mae’n ôl! Mae Typhoon yr RAF yn dod i Abertawe

By

Disgwylir i jet byd-enwog Typhoon yr RAF ddiddanu cynulleidfaoedd yn Sioe Awyr Cymru yr haf hwn.

Dyma’r ail enw mawr a gadarnhawyd ar gyfer y digwyddiad deuddydd am ddim y disgwylir iddo ddod i Fae Abertawe ar 6 a 7 Gorffennaf.

Trefnir y sioe flynyddol gan y cyngor – a disgwylir i’r Typhoon, sy’n gallu teithio bron ddwywaith cyflymder sain, ymddangos ar y ddau ddiwrnod.

Disgwylir i’r Red Arrows ymddangos ar y dydd Sadwrn, a bydd llawer o sêr eraill yr awyr ac amrywiaeth eang o hwyl i’r teulu ar y ddaear ar gael drwy gydol y penwythnos mawr, gan gynnwys arddangosiadau, profiadau realiti rhithwir a cherddoriaeth fyw.

Meddai Aelod Cabinet y Cyngor, Robert Francis-Davies, “Bydd Sioe Awyr Cymru’n benwythnos gwych yr haf hwn ac rydym yn falch iawn y bydd y Typhoon yn hedfan dros Abertawe eto.

“Mae’r sioe awyr, gyda’i hawyrgylch teuluol gwych, yn bartner gwych ar gyfer digwyddiadau mawr lleol eraill, fel IRONMAN 70.3 Abertawe a Chyfres Para Treiathlon y Byd Abertawe.

“Mae’n cyfrannu miliynau o bunnoedd at ein heconomi leol.”

Sioe awyr wych yn denu torfeydd enfawr

By

Roedd Sioe Awyr Cymru Abertawe’n benwythnos gwych gyda channoedd ar filoedd o bobl yn mwynhau sioe awyr agored am ddim fwyaf y wlad.

Roedd ymwelwyr o bob rhan o’r DU wrth eu boddau gyda’r dau ddiwrnod o hedfan. Gwelodd y digwyddiad a drefnwyd gan y cyngor hefyd dorfeydd enfawr yn mwynhau gweithgareddau rhyngweithiol ar y ddaear.

Bydd Sioe Awyr Cymru’r flwyddyn nesaf, ar 6-7 Gorffennaf, yn cynnal digwyddiad partner newydd – ar y dydd Sadwrn bydd Abertawe’n cynnal Diwrnod Cenedlaethol y Lluoedd Arfog Cymru 2024.

Meddai Aelod Cabinet y cyngor, Robert Francis-Davies, “Dyma un o uchafbwyntiau calendr digwyddiadau blynyddol Abertawe, ac roedd y sioe flynyddol yn llwyddiant ysgubol, gan barhau i gefnogi enw da’r ddinas fel lleoliad o’r radd flaenaf ar gyfer digwyddiadau mawr.

“Mae’n cyfrannu miliynau o bunnoedd at yr economi leol a diolchwn i fusnesau a phreswylwyr lleol am eu hamynedd wrth i ni gau ffyrdd ac i’r holl fasnachwyr am eu cyfraniad.”

Talodd deyrnged i’r ymdrech a wnaed gan staff y cyngor, y gwasanaethau brys, noddwyr y sioe a phartneriaid eraill y cyngor a helpodd i sicrhau bod y digwyddiad yn un o safon i’r ddinas.

Bydd yn cynnwys arddangosfeydd milwrol, gorymdeithiau ac adloniant i ddathlu cyfraniad y rheini sy’n gwasanaethu yn y Lluoedd Arfog, cyn-filwyr, milwyr wrth gefn, lluoedd y cadetiaid a gwirfoddolwyr.

YN DYCHWELYD I’R AWYR UWCHBEN BAE ABERTAWE AR 5 A 6 GORFFENNAF 2025!

Mae Sioe Awyr Cymru, sy’n cynnwys arddangosiadau erobateg gwefreiddiol, awyrennau milwrol cyfoes ac awyrennau o’r oes a fu, yn diddanu miloedd ar filoedd o ymwelwyr ym Mae Abertawe bob blwyddyn. Gallwch ddisgwyl gweld arddangosiadau awyr cyffrous, arddangosiadau anhygoel ar y ddaear, adloniant a llawer mwy. I gael y newyddion diweddaraf, cofrestrwch ar gyfer ein rhestr bostio a dilynwch ni ar ein cyfryngau cymdeithasol.

Sut mae Sioe Awyr Cymru’n edrych?

Joio Bae Abertawe

Dewch o hyd i arweiniad cynhwysfawr ar gyfer digwyddiadau eraill a gynhelir ym Mae Abertawe eleni ar wefan Joio Bae Abertawe

Joio Bae Abertawe

Cysylltwch a ni

Cyngor Abertawe

Cyflwynir y digwyddiad hwn i chi gan dîm diwylliant a digwyddiadau Dinas a Sir Abertawe.